Sagnarandinn

Það tilkynnist hér með að ég er að fremja myrkraverk. Perurnar í báðum loftljósunum eru sem sagt farnar. En sem ég sit hér og skrifa þetta kemur eiginmaðurinn með áltröppuna og segir: "Best að laga allt fyrst maður er að þessu á annað borð," og eyðileggur þannig myrkraverkið fyrir mér. Og nú er búið að skipta um peru á báðum stöðunum. Annars er það að frétta héðan af Tjarnarbóli að í gær keyptum við geysifallegan hillurekka á baðið í staðinn fyrir basthilluna sem var bráðabirgðalausn fyrir hartnær 20 árum. Morguninn fór í að skrúfa hann saman og nú er baðið hjá okkur geysilega flott. Og við erum líka búin að fara í Sorpu með basthilluna og allt pappadraslið. Vitið þið að það munar bara einum staf á basthilla og Bastilla?